Narvi E. B. Jensen vann í dag gull í Norðurlendska Ungdómsmeistaraskapinum í bogaskjóting  í Svøríki

14 ára gamli føroyski compoundskjúttin Narvi E. B. Jensen endaði í dag ovast á sigurspallinum í einstaklingakappingini í compound hjá dreingjum U16 í NUM (Norðurlendska Ungdomsmeistaraskapinum í bogaskjóting) í Borås í Svøríki.

Tilsamans 15 dreingir úr Svøríki, Finnlandi, Danmark, Noregi, Íslandi og Føroyum kappaðust, og Narvi var einasti føroyingurin í bólkinum.

Narvi bleiv nummar fýra í innleiðandi kappingini í gjár. Í áttandapartsfinaluni vann hann sannførandi 138 – 103 á íslendinginum Birkir Björnsson, og í fjórðingsfinaluni basti hann dananum Samuel Frederiksen 136 – 133. Lagt var upp til eina spennandi hálvfinalu ímóti finnanum Niilo Virtanen. Hesin hevði vunnið innleiðandi kappingina, ið gav beinleiðis pláss í fjórðingsfinaluni, sum hann eisini vann sannførandi. Men Narvi lat seg ikki ræða, og vísti seg eisini at vera væl betri í hálvfinaluni – hann vann fýra umfør, eitt var javnt, og samanlagt vann hann 141 – 132.

Føroyski gullvinnarin Narvi E. B. Jensen í miðjuni, vinstrumegin er tað silvurvinnarin Viktor Johnsson, Svøríki,og høgrumegin er tað bronsuvinnarin Car Wenneberg, Svøríki

Meira spenningur var í finaluni ímóti svianum Viktor Johnsson, sum var blivin nummar tvey í innleiðandi kappingini. Narvi vann fyrsta umfarið 29 – 26, næsta umfarið endaði javnt 27 – 27, og triðja umfarið vann Narvi tepurt 28 – 27. Tá sviin síðan vann fjórða umfarið 29 – 28, kom spenningur í aftur, men Narvi var tó í javnvág restina av dystinum, seinasta umfarið endaði javnt 26 – 26, og hann vann finaluna samanlagt 138 – 135.

Hjá U18-dreingjunum í compound bleiv Jónas B. Poulsen eisini nummar fýra í innleiðandi kappingini, har níggju dreingir kappaðust. Hann lá leingi á triðja plássi, sum hevði givið beinleiðis atgongd til hálvfinalurnar, men tá so ein pílur fór púra skeivur, glapp triðjaplássið honum av hondum. Í fjórðingsfinaluni tapti hann 128 – 133 ímóti svianum Leo Werner.

Lilja Strøm Winther endaði saman við sjey øðrum á einum níggjundaplássi í sínum bólki, barebow gentur U18, har 19 gentur kappaðust.

Lea Karina Haraldsen býtti eisini níggjundaplássið í sínum bólki, recurve gentur U16, har 28 gentur kappaðust.

Brandur T. Hansen býtti 17. Plássi í sínum bólki, recurve dreingir U16, 23 dreingir kappaðust.

Kappingin endar í morgin, sunnudagin, við liðkappingum.