Ein nevndarlimur stendur fyri vali á aðalfundinum hjá Bogaskjótisambandinum hesa ferð

Mikukvøldið 18. juni klokkan 19 heldur Bogaskjótisamband Føroya sín ársaðalfund í ÍSF-hølunum á Eystaru Bryggju 30 í Havn (ovasta hædd).

Skráin er henda sambært § 4, 2 í viðtøkunum (Lóg fyri Bogaskjótisamband Føroya):

• Val av orðstýrara.
• Starvsnevndarformaðurin greiðir frá virki BSKF’s í farna ári.
• Framløga av grannskoðaðum roknskapi.
• Val av nevndum, tiltakslimum og grannskoðara.
• Innkomin mál.
• Ymiskt.

Bogaskjótifeløgini velja umboð at senda á aðalfundin. Hvørt felag kann senda í mesta lagi trý umboð á aðalfund, men feløgini hava tó bert eina atkvøðu í part, tá atkvøtt verður. Afturat teimum hava tey trý starvsnevndarumboðini atkvøðurætt.

Umframt hesi kunnu umboð fyri dómsnevndina hjá BSKF, tá ein sovorðin er, grannskoðarin hjá sambandinum og umboð fyri ÍSF møta á aðalfundi, tó uttan at hava atkvøðurætt.

Til ber at kunna seg nærri um viðtøkurnar – ella ”Lóg fyri Bogaskjótisamband Føroya”, sum tær formliga eita – og ásetingarnar um aðalfund HER.

Hans Petur Højgaard úr Ørvi stendur fyri vali til starvsnevndina hesa ferð. Hinir í starvsnevndini eru Fróði H. Poulsen, Vágaskot, formaður, og Jógvan Niclasen, Tambar, næstformaður. Ein tiltakslimur skal eisini veljast fyri eitt ár, og í løtuni er Pernille Krogh úr Vágaskoti tiltakslimur.