Næsta vikuskifti er aftur bogaskjótikapping á skránni. Tá verður fjórða grand prix-kappingin í vetur umframt sum altíð barna- og ungdómskapping. Freistin at tekna seg er longu týskvøldið 3. desember

Longu næsta vikuskifti er aftur bogaskjótikapping, og nú eigur Ørvur aftur tørn at vera vertur. Leygardagin 7. desember kappast U12, U16 og U18 úr ávikavist 8, 12 og 18 metra frástøðu, og sunnudagin 8. desember verður fjórða grand prix-kappingin hjá teimum vaksnu skjúttunum úr 18 metrum.

Báðar dagarnar byrjar kappingin klokkan 14, og upphitingin byrjar ein hálvan tíma áðrenn. Fyrivarni verður tikið fyri broytingum, um áhugin at luttaka er eins stórur og til seinastu kapping í Søldarfirði. Tá varð neyðugt at býta kappingina hjá teimum vaksnu í tvey, soleiðis at compoundskjúttarnir kappaðust fyrrapart og berboga- og recurve-skjúttarnir seinnapartin.

Leinki at tekna seg til kappingina er HER.

GG! Seinasta freist at tekna seg er longu týskvøldið 3. desember klokkan 22.