Tað verða tríggjar úttøkukappingar til Oyggjaleikirnar í Orknoyggjum í summar, tvær í apríl og ein í mai. Kappingarnar verða skipaðar sum full FITA-umfør

Í døgunum 12. – 18. juli verða Oyggjaleikir 2025 í Orknoyggjum, og tíðin nærkast, at teir best skikkaðu bogaskjúttarnir at umboða Føroyar skulu finnast.

Føroyar kunnu senda fýra kvinnur og fýra menn í bólkunum recurve og compound til Oyggjaleikirnar, tilsamans 16 skjúttar, og nevndin í Bogaskjótisambandi Føroya, BSKF, hevur gjørt av, at tríggjar úttøkukappingar skulu gera av, hvør sleppur við.

Treytin fyri luttøku í úttøkukappingunum er, at viðkomandi skjútti hevur tikið lut í minst fimm góðkendum kappingum gjøgnum veturin, íroknað kappingar uttanlands.

Úttøkukappingarnar verða væntandi á uttandura bogaskjótibreytini í Hoydølum 19. ella 21. apríl (annar páskadagur), 26. ella 27. apríl, og seinasta úttøkukappingin verður 3. ella 4. mai. Veðurforsagnirnar gera av, hvør dagur í teimum trimum vikuskiftunum verður valdur, og boðað verður frá hesum á heimasíðuni hjá BSKF og á Facebook-vanganum í seinasta lagi hósdagin fyri kappingarvikuskiftið.

Tekningarlistar til kappingarnar verða lagdir út her á heimasíðuni komandi vikuskifti.

Kappingarnar verða skipaðar sum full FITA-umfør, har tað í hvørjum umfari verða skotnir tilsamans 144 pílar í fýra ymiskum frástøðum. Hjá monnum eru frástøðurnar 90, 70, 50 og 30 metrar, og hjá kvinnum eru frástøðurnar 70, 60, 50 og 30 metrar.

Fyri hvønn skjútta er tað miðal fyri tvær tær bestu kappingarnar, ið telur sum endaliga úrsliti, og úttøkukrøvini eru 1.260 stig fyri compound menn, 1.200 fyri compound kvinnur, 1.075 fyri recurve menn og 980 fyri recurve kvinnur.