Innandurakappingin í bogaskjóting endaði við FM-skjóting í Miðvági um vikuskiftið. Mest óvæntaðu úrslitini mundu vera hjá recurve-kvinnunum, har Tóra Dinna Reynskor vann FM, og hjá compound-monnunum, har Nikkel Petersen, vann FM-gullið

Inntil bogaskjótikappingina í Hvalba næstseinasta vikuskifti hevði pólska Jagoda Wardak vunnið allar recurve-kappingarnar, sum hon hevði luttikið í, síðan hon fór at skjóta við Tambum í Havn fyri júst einum ári síðan. Men í Hvalba tapti hon óvæntað finaluna ímóti Anniku Næs Johannesen úr Team SuðurSkot, og sunnudagin tapti hon so aftur í Miðvági – hesa ferð ein so týðandi dyst sum FM-finaluna ímóti Tóru Dinnu Reynskor úr Vágaskoti.

Tóra Dinna vann enntá finaluna sannførandi 7 – 1. Eisini bronsufinalan hjá recurve-kvinnunum hevði ein heldur óvæntaðan vinnara, tá Barbara Krossteig úr Tambum vann 6 – 4 á Pernille Krogh úr Vágaskoti.

Jóannes tapti eisini

Hjá compound-monnunum var úrslitið í FM-kappingini eins óvæntað og tað hjá recurvekvinnunum.

Áðrenn kappingina í Miðvági sunnudagin hevði Jóannes Poulsen úr Ørvi vunnið alt, sum vinnast kundi í vetrarkappingini. Hann hevur eisini havt fleiri framúr úrslit í vetur, og í kappingini, sum var í Miðvági 1. desember, gjørdi hann tað bragd at fáa fulla úrtøku í finaluumfarinum – tað merkir, at hann rakti á blettin við øllum 15  pílunum og fekk 150 stig.

Men í tí mest avgerandi dystinum í heimligu kappingini í vetur, nevniliga finaluhólmgonguni ímóti liðfelaganum Nikkel Petersen, steðgaði sigursrøðin. Nikkel vann finaluna og FM-gullið við einum stigi, 146 – 145. Jógvan Niclasen, Tambar, vann bronsuna.

Hans Petur endurvann FM

Hjá recurve-monnunum endurvann Hans Petur Højgaard úr Ørvi FM-gullið, sum hann tapti í fjør. Hann vann í finaluni á Tummasi P. Hansen úr Tambum, sum annars hevur havt fleiri góð úrslit í endanum á vetrarkappingini. Veteranurin Eggaba Andreasen úr Vágaskoti vann bronsufinaluna á einum øðrum veterani, nevniliga Absalon Hansen úr Tambum.

Anja vann aftur

Hjá compound-kvinnunum gjørdi Anja Eydnydóttir úr Vágaskoti aftur bart. Hon hevur vunnið allar kappingarnar, sum hon hevur luttikið í í vetur, og FM-finalan ímóti Helenu við Misá úr Ørvi var onki undantak. Bronsuna vann Rakul Dam, Tambar.

Ongin hevði teknað seg til FM við berboga hjá kvinnum, men hjá monnunum vildi Frank Madsen, Team SuðurSkot, verja FM-sigurin frá í fjør. Tað slapp hann at gera uttan mótstøðu, tí ongin bjóðaði honum av.

U18 uttan mótstøðu

FM hjá U18 var eisini á skrá sunnudagin, og eisini her vóru úrslitini kend frammanundan. Tey einastu, sum høvdu teknað seg, vóru nevniliga Lilja Strøm Winther, berbogaskjútti úr Team SuðurSkot, og compound-skjúttin Jónas B. Poulsen úr Ørvi. Tey vunnu tískil FM í sínum bólkum uttan mótstøðu.

FM U18 berbogi gentur. Lilja Strøm Winther (Team SuðurSkot), gull

FM U18 compound dreingir. Jónas B. Poulsen (Ørvur), gull

Nakrir dystir í U16

Leygardagin kappaðist U16 um FM í 12 metur frástøðu, og her var undirtøkan í lakara lagi. Tað gjørdist serliga sjónligt við tað, at nakrir av skjúttunum, sum høvdu teknað seg, ikki møttu upp kortini.

Dystast bleiv tó um nøkur av heiðursmerkjunum. Hjá dreingjum við berboga vóru Arthur Olsen úr Tambum og Poul Jóhannes Næs Tavsen úr Vágaskoti í duell, og hana vann Arthur 6 – 0, eftir at hann eisini hevði vunnið innleiðandi kappingina sannførandi.

Hjá gentum recurve kappaðust tær tríggjar Lea Naomi H. Niclasen, Serafia Ró E. Ragnarsdóttir og Anna Daisi Havmand, allar úr Tambum. Lea Naomi vann innleiðandi kappingina og slapp beinleiðis í finaluna, meðan hinar báðar skuldu skjóta hálvfinalu. Hana vann Serafia 6 – 2, men tapti síðan finaluna ímóti Leu Naomi 0 – 6.

Hjá dreingjum recurve brustu Brandur T. Hansen úr Tambum og Jón Sjúrður Jóhansson úr Vágaskoti enn einaferð saman. Brandur var tann beinraknari, hann vann innleiðandi kappingina og síðan finaluna 6 – 2.

Marta B. Poulsen úr Ørvi stillaði einsamøll upp til FM í compound hjá gentunum og vann tískil FM-heitið uttan mótstøðu.

Hjá compound-dreingjunum vóru tveir um boðið, Narvi E. B Jensen og Rói Højgaard, báðir úr Ørvi. Her vann Narvi fyrst innleiðandi kappingina og síðan finaluna 141 – 134.

Grand Prix 2024-2025

Grand Prix-heiðusmerkini blivu eisini handað sunnudagin. Í Grand Prix kappingini telja fimm tær bestu innleiðandi kappingarnar hjá hvørjum einstøkum seniori. Tað merkir so aftur, at fyri at kunna luttaka í Grand Prix-kappingini skal vikomandi skjútti hava verið við í minst fimm innandurakappingum gjøgnum veturin.

Grand Prix-vinnararnir vóru hesir:

Kvinnur recurve: Jagoda Wardak (Tambar), gull, Tóra Dinna Reynskor (Vágaskot), silvur, og Pernille Krogh (Vágaskot), bronsu.

Menn recurve: Hans Petur Højgaard (Ørvur), gull, Bárður Magnusson (Vágaskot), silvur, og Tummas P. Hansen (Tambar), bronsu

Kvinnur compound: Anja Eydnudóttir (Vágaskot), gull, Helena við Misá (Ørvur), silvur, og Rakul Dam (Tambar), bronsu.

Menn Compound: Jóannes Poulsen (Vágaskot), gull, Nikkel Petersen (Ørvur), silvur, og Jógvan Niclasen (Tambar), bronsu

Jagoda Wardak vann gullheiðursmerki og ferðasteyp til láns í Grand Prixkappingini hjá recurve-kvinnunum. Tóra Dinna Reynskor, vinstrumegin, vann silvur, og Pernille Krogh, høgrumegin, vann bronsu

Í fjør vann Hans Petur Højgaard (Ørvur) Grand Prix-ferðasteypið hjá recurve-monnunum til ognar, men Eggaba Andreasen hevði syrgt fyri, at hansara fyritøka, Sandgrevstur & Planering, hevði sett eitt nýtt steyp í umfer. Bárður Magnusson, Grand Prix-silvurvinnarin, var ikki heima sunnudagin, og bronsuvinnarin Tummas P. Hansen var farin avstað, tá Grand Prix-heiðursmerkini blivu handað

Anja Eydnudóttir (Vágaskot) fekk í posa og sekk. Hon vann bæði FM og Grand Prix-kappingina. Helena við Misá vann Grand Prix-silvurið, og Rakul Dam bronsuna

Jóannes Poulsen (Ørvur) misti FM-gullið í compound á stokkinum hesa ferð, men Grand Prix-sigurin var ongantíð í vanda. Nikkel Petersen (Ørvur) vann Grand Prix-silvurið, og Jógvan Niclasen (Tambar) bronsuna

--

Úrslit FM U16 leygardagin 15. mars:

FM U16, dreingir berbogi, 12 metur

Innleiðandi:

Arthur Olsen (Tambar), 196+202 = 398.

Poul Jóhannes Næs Tavsen (Vágaskot), 41+80 = 121.

Finala:

Arthur – Poul Jóhannes, 6 – 0.

FM U16, gentur recurve, 12 metur

Innleiðandi:

Lea Naomi H. Niclasen (Tambar), 183+146 = 329.

Serafia Ró E. Ragnarsdóttir (Tambar), 128+108 = 236.

Anna Daisi Havmand (Tambar), 128+108 = 236.

Hálvfinala:

Serafia – Anna Daisi, 6 – 2.

Finala:

Lea Naomi – Serafia, 6 – 0.

FM U16, dreingir recurve, 12 metur

Innleiðandi:

Brandur T. Hansen (Tambar), 216+236 = 452

Jón Sjúrður Jóhansson (Vágaskot), 220+207 = 427

Finala:

Brandur – Jón Sjúrður, 6 – 2.

FM U16, gentur compound, 12 metur

Innleiðandi og endaligt:

Marta B. Poulsen (Ørvur), 260+263 = 523.

FM U16, dreingir compound, 12 metur

Innleiðandi:

Narvi E. B. Jensen (Ørvur), 279+285 = 564.

Rói Højgaard (Ørvur), 268+248 = 516.

Finala:

Narvi – Rói, 141 – 134.

U18 og seniorar sunnudagin

FM U18, gentur berbogi, 18 metur

Innleiðandi og endaligt:

Lilja Strøm Winther (Team SuðurSkot), 193+178 = 371.

FM U18, dreingir compound, 18 metur

Innleiðandi og endaligt:

Jónas B. Poulsen (Ørvur), 278+271 = 549.

--

Menn berbogi

Innleiðandi og endaligt:

Frank Madsen (Team SuðurSkot), 152+140 = 292.

Kvinnur recurve

Innleiðandi:

Jagoda Wardak (Tambar), 267+253 = 520.

Pernille Krogh (Vágaskot), 243+252 = 495.

Tóra Dinna Reynskor (Vágaskot), 249+243 = 492.

Barbara Krossteig (Tambar), 235+246 = 481.

Annika Næs Johannesen (Team SuðurSkot), 220+230 = 450.

Solveig Hansen (Tambar), 200+200 = 400.

Amy við Rætt (Ørvur), 186+178 = 364.

Fjórðingsfinalur:

Barbara – Annika, 6 – 0.

Tóra Dinna – Solveig, 6 – 0.

Pernille – Amy, 6 – 4.

Hálvfinalur:

Jagoda – Barbara, 6 – 4.

Tóra Dinna – Pernille, 6 – 0.

Bronsufinala:

Barbara – Pernille, 6 – 4.

Finala:

Tóra Dinna – Jagoda, 7 – 1.

Menn recurve

Innleiðandi:

Hans Petur Højgaard (Ørvur), 268+277 = 545.

Tummas P. Hansen (Tambar), 264+265 = 529.

Absalon Hansen (Tambar), 267+256 = 523.

Eggaba Andreasen (Vágaskot), 251+263 = 514.

Hálvfinalur:

Hans Petur – Eggaba, 7 – 3.

Tummas – Absalon, 6 – 2.

Bronsufinala:

Eggaba – Absalon, 6 – 4.

Finala:

Hans Petur – Tummas, 7 – 3.

Kvinnur compound

Innleiðandi:

Anja Eydnudóttir (Vágaskot), 285+279 = 564.

Helena við Misá (Ørvur), 269+267 = 536.

Rakul Dam (Tambar), 200+223 = 423.

Hálvfinala:

Helena – Rakul, 131 – 129.

Finala:

Anja – Rakul, 140 – 135.

Menn compound

Innleiðandi:

Jóannes Poulsen (Ørvur), 294+288 = 582.

Jógvan Niclasen (Tambar), 289+284 = 573.

Nikkel Petersen (Ørvur), 282+289 = 571.

Bogi Andreasen (Vágaskot), 280+284 = 564.

Magnus Andreassen (Ørvur), 279+272 = 551.

Jónas B. Poulsen (Ørvur), 278+271 = 549.

Fjórðingsfinalur:

Bogi – Magnus, 141 – 136.

Nikkel – Jónas, 146 – 135.

Hálvfinalur:

Jóannes – Bogi, 144 – 139.

Nikkel – Jógvan, 145 – 143.

Bronsufinala:

Jógvan – Bogi, 145 – 143.

Finala:

Nikkel – Jóannes, 146 – 145.